CEBU, Philippines - Pagsaksi sa kamatuoran ang tipik sa mensahe ni Arsobispo Jose Palma atol sa Pontifical Mass kagahapon sa buntag sa kapistahan ni St. Catherine de Alexandria sa Dakbayan sa Carcar.
Matud sa Arsobispo nga ang pagsaksi sa kamatuoran dili lunlon kalipay tungod kay adunay dili mahimuot ug masakitan.
Sumala pa ni Palma nga ang panaghiusa sa katawhan ug pag-ampo ang labing lig-on nga hinagiban batok sa mga tawo nga nagtinguha sa pagsabwag og kadautan.
Gipadayag ni Palma nga ang martyrdom sa tawo nagagumikan sa pagtuo sa Ginoo ug pagsabwag sa kamatuoran.
Giawhag usab ni Palma ang katawhan nga moapil sa kalihukan sa umaabot nga International Eucharistic Congress sama sa Opening Mass, prosesyon ug Closing Mass sa San Pedro Calungsod sa South Road Properties. (BANAT NEWS)