Shotgun nibuto, estudyante napiksan

CEBU, Philippines – Usa ka estudiyante ang naangol human napiksan og splinter dihang aksidenteng nibuto ang shotgun sa usa ka gwardiya sa usa ka mall diha sa dalan Colon ning Dakbayan sa Sugbo sa miaging hapon.

Apan matud pa ni Senior Police Officer 4 Blas Ejoc, desk officer sa Waterfront Police nga nahinabi sa Banat News wala na nila nakuha ang pangalan sa estudiyante kay wala man kini mireklamo sa ilang buhatan.

Sumala pa ni Ejoc nga nagdali usab  nga mibiya sa lugar ang babaye nga estudiyante kay duna pa kini pasulit sa ilang klase.

Sa imbestigasyon sa kapulisan nasayran nga samtang nag-roving ang guwardiya nga si Alexander Elma, 36, iyang nakit-an ang usa ka lalaki nga nagbarog barog duol sa pharmacy sa maong mall ug iya kining gibadlong.

Ang lalaki gituohang nagbaligya og peke nga PO o purchase order sa mga tawo nga kadaghan na usab nga gireklamo sa mga tawo, apan adunay nahitabong panaglalis sa ilang duha.

Ang laing kauban nga guwardiya nga si John Melchor Quevedo daling mikuha sa shotgun ni Elma aron paglikay  unta nga iyang magamit ang armas batok sa maong lalaki apan aksidente kining nakablitan ug nibuto tumong sa sementong salog.

Tayming usab nga milabay sa maong dapit ang estudiyanteng babaye ug napiksan sa tipaka sa semento sa iyang tiil nga dali usab nga gitambalan sa medical team sa maong mall.

Gipasabot ni Ejoc nga gumikan kay wala ma’y mireklamo batok sa guwardiya ila ra usab kini nga gibuhian apan ila na lang kini nga gipapirma nga kinahanglan kining mobalik sa ilang buhatan kung makahukom nga moreklamo ang estudiyante. – /EIM) (BANAT NEWS)