CEBU, Philippines – Gipasirad-an sa kagamhanan sa Dakbayan sa Lapu-Lapu ang usa ka computer shop human nakalapas sa ordinansa ug nasuta nga wala’y business permit.
Ang computer shop nga gipasirad-an gipanag-iya ni Vincent Taleon, nahimutang sa Deca 4, Blk. 24, Barangay Bangkal.
Diha’ng gi-serve ang closure order, ang mga batan-on nga nagduwa napugos sa pag-undang kay gidid-an man ang tag-iya sa pag-operate gumikan sa kalapasan nga nahimo.
Matud ni Antonio Utrera, pangulo sa Cities Advocacy for Responsible Enterprise, nga atol sa ila’ng inspeksiyon niadtong Nobiyembre 16 sa alas 11 sa buntag, naabtan nila nga dunay mga estudyante nga nagduwa nga residente ra usab sa barangay.
Gikuhaan nila og picture ang mga bata lakip ang mga ngalan ug gi-refer sa Bangkal Elementary School ug nakakuha sila og certification gikan sa tunghaan nga kadto’ng mga tinun-an nga nagduwa wala manulod sa klase niadto’ng higayona.
Aron maka-operate og balik ang computer shop ni Taleon kinahanglan nga malimpyohan niini ang mga violations nga iya’ng nahimo.
Ang tag-iya gipukaw kay natulog diha’ng gi-serve ang closure order ug niingon nga andam siya nga mo-comply sa mga gikinahanglan nga mga rekisitos aron makabalik sa iya’ng negosyo.
Gihulagway ni Utrera ang computer shop nga wala’y permit ug magpaduwa og mga bata bisan oras sa tingklase nga moresulta na hinuon nga dili moeskwela.
Tinguha ni Lapu-Lapu City Mayor Paz Radaza nga maprotektahan ang mga bata ilabi na ang ila’ng ugma kay kun pasagdan hayan dili gyud sila makahuman sa pagtungha.
Hangyo nila niadto’ng nagplano nga magnegosyo og internetan nga kinahanglan mosunod sa unsa’y nakalatid sa balaud aron dili pasirad-an. – /GMR) (BANAT NEWS)