CEBU, Philippines – Nipadayag sa iya’ng kasagmuyo ang usa ka negosyante nga nipasaka og kaso’ng graft and corruption batok ni Talisay City Mayor Johnny de los Reyes.
Si Vicente “Jun” Cabrera niatubang sa mga tigbalita kagahapon aron mapabuhagay ang iya’ng kasagmuyo sa buhatan sa Visayas Ombudsman tungod sa wala pagtagad sa iya’ng kaso nga niabot na kapin sa usa ka tuig.
"Nagtuo ko nga paspas ang dagan sa imbestigasyun sa Ombudsman kalabot sa ako’ng kaso apan nasayop diay ko. Sige man unta ko’g follow-up niini kay dili tiaw ning kantidad sa kwarta nga giwaldas sa namunoan," matud ni Cabrera sa Banat News.
Marso 2014 pa nipasaka og kaso si Cabrera kinsa niingon nga wala’y tarong nga tubag ang iya’ng madunggan sa buhatan sa Ombudsman.
Nunot niini naka-hunahuna si Cabrera nga moadto sa buhatan ni Ombudsman Conchita Carpio.
"Nagduda na lang nuon ko nga abi’g sakop man sa LP ang gikasohan ilang gibaliwala ang kaso. Klaro man nga dili matuwid na daan si JVR kay ang ako’ng kaso nagbase man sa COA report. I hope nasayop ko sa akong pagduda sa LP," dugang ni Cabrera.
Nanghinaut si Cabrera nga motubag si Carpio sa iya’ng hangyo.
Si Cabrera nga taga Dakbayan sa Talisay mao’y unang nikiha batok ni de los Reyes ug sa anak nga si John Yre kinsa mao’y City Administrator ug chairman sa Bids and Awards Committee (BAC) kaniadto.
Lakip sa gikiha si Budget Officer Edgar Mabunay, City Treasurer Emma Macuto ug ang tag-iya sa Black Pearl Security Agency nga si Baltaire Balangauan.
Kini tungod sa pagkuha sa serbisyo sa security agency nga wala’y bidding ug wala’y pagtugot sa konseho.
Si Deputy Ombudsman for the Visayas, Atty. Paul Elmer Clemente, nipadala og suwat sa duha ka habig apil na ni Cabrera sa pagduso sa ila’ng position paper ug dugang mga ebidensiya ug affidavit alang sa pormal nga imbestigasyon niadto’ng Pebrero apan hangtud karon wala pa makasibog sa imbestigasyon ang mao’ng buhatan. – /GMR) (BANAT NEWS)