CEBU, Philippines – Nahibulong si Bise Mayor Efren Gica sa Dumanjug ngano’ng nireklamo si Mayor Nelson Garcia sa iya’ng budget nga P28 milyones alang sa sunod tuig samtang P27 milyones ang sa legislative. “Unsa ma’y iya’ng hilakan niana ug unsa ma’y iya’ng angalan niana? Maayo man ang pagkahan-ay sa budget sa lungsod sa Dumanjug alang sa sunod tuig,” matud ni Gica.
Si Gica mao’y acting mayor diha’ng gipasar ang 2016 budget sa lungsod samtang suspendido pa si Garcia.
Niadto’ng Nobiyembre 16, si Garcia nireklamo sa hunta probinsiyal nga ang pagpasar sa budget ilegal tungod kay wala’y nahitabo’ng quorum ug wala nasubay sa rekisitos ubos sa Section 53 sa Local Government Code of 1991.
Matud ni Garcia nga lima lang ka sakop sa konseho ang nitambong sa session.
Si Gica nipasabot nga ubos sa balaud, “simple majority” lang ang gikinahanglan aron maaprobahan ang budget.
Matud ni Gica nga niadtong higayona ang konseho gilangkuban sa walo sanglit ang numero uno’ng konsehal mao man usab ang acting vice mayor.
Dugang ni Gica nga diha’ng gituki ang 2016 budget, ang lima ka konsehal ang nibotar sa pagpasar niini. – /GMR) (BANAT NEWS)