CEBU, Philippines – Gipagamyan sa Comelec ang gidaghanon sa mga botante sa matag clustered precincts itandi sa milabay’ng mga eleksiyon aron dili malangay ang pagbotar kay magdasok na tungod sa kadaghan.
Kun kaniadto 1,000 ka botante matag clustered precinct apan karon gihimo na lang kining 800 ka botante apan magdugang sila og mga clustered precincts.
Si Lionel Marco Castillano, provincial Comelec officer nagkanayon nga ang kamandoan gikan mismo sa ilang ulohang buhatan.
Sa pagkakaron padayon pa ang pag-ipon sa mga rehistradong botante aron sila bahin-bahinon ngadto sa mga clustered precincts apan kinahanglan nga dili molapas sa 800 ka botante.
Matud ni Castillano nga sa ilang kasinatian mga 80 porsiyento lang sa naa sa listahan sa matag clustered precincts ang namotar.
Ang Comelec midugang og 3,000 ka Optical Mark Reading (OMR) machines tungod kay midaghan usab karon ang mga botante tungod sa gihingusgang mall registrations nga naglakip sa mga botanteng namalik pagpa-reactivate sa ilang rehistrasyon. – /EIM) (BANAT NEWS)