CEBU, Philippines - Gihangop sa kahugpongan sa kababayen-an sa lungsod sa Argao ang proyekto nga Bugasan sa Kababayen-an nga gipasiugdahan ni Gobernador Hilario Davide III.
Mikabat sa 35 ka women’s association sa lungsod sa Argao ang mipahimulos sa Bugasan sa Kababayen-an, proyekto nga abag sa Kapitolyo alang sa ilang panginabuhian.
Si Davide nakigpirmahay og kasabotan tali sa Argao Women’s Association nga gipangulohan ni Sylvia Biton alang sa mao nga proyekto.
Apil nga mipirma mao sila si Bise Gobernador Agnes Magpale ug Mayor Edsel Galeos isip mga saksi nga hingpit gyud nga ipatuman ang mao nga proyekto.
Ang matag grupo hatagan og 10 ka sako nga NFA rice nga nagkantidad og P12,500 isip ilang starting capital aron makasugod ang kababayen-an sa ilang retail business sa bugas.
Ang presidente sa Talaga (Argao) Women’s Association nga si Julita Untal nagkanayon nga daku kaayong tabang ngadto kanila ang proyekto kay makapalit sila og barato nga bugas ug ang asosasyon duna pa’y kita.
Ang asosasyon nagbaligya sa bugas sa kantidad nga P28 matag kilo samtang ang quality nga NFA rice tag P34 matag kilo. Kadtong mga kuwang og kuwarta tugotan ra nila nga utangon lang usa ang bayad ug bayran lang sulod sa usa ka semana.
Matud ni Magpale nga tumong sa programa mao ang pag-empower sa kababayen-an pinaagi sa paghatag kanila og panginabuhian.
Ang Bugasan sa Kababayen-an gipatuman kini sa milabay’ng lima ka tuig ug ang asosasyon sa kababayen-an sa lungsod sa Carmen nakaganansya na og P1 milyon.
Subay niini, base sa report sa Provincial Social Welfare and Development Office (PSWDO) ang grupo sa kababayen-an sa dakbayan sa Carcar nakaganansya na usab og P600 mil.
Si Magpale nagkanayon usab nga gawas sa bugasan may lain usab sila nga livelihood projects sa kababayen-an sama sa hair culture, manicure, soap-making ug candle-making diin naimplementar na kini sa tibuok probinsiya. (BANAT NEWS)