CEBU, Philippines - Naputos sa bun-og ug nahubag ang nawong sa 17 anyos nga lalaki human kini nakulatahan sa mga estambay sa Sitio Lacaran, Barangay Pitalo lungsod sa San Fernando human kini gipasanginlan nga nanglungkab og tindahan sa nakalabay nga gabii.
Ang suspetsado gibalhog karon sa selda sa kapulisan taga Sitio Caduldulan, barangay Lawaan dakbayan sa Talisay.
Matud pa ni Police Officer 3 Marjoken Misuari, desk officer sa San Fernando Police nga nahinabi sa Banat News adunay kauban ang suspetsado atol sa ilang pagpanglungkab sa usa ka tindahan ni Carmencita Brillantes, 60, apan nakaikyas.
Sumala pa ni Misuari nakabantay si Brillantes nga adunay nisud sa iyang tindahan ug misinggit og tabang hinungdan sa pagresponde sa mga estambay ug gigukod ang duha ka mga lalaki, apan ang menor de edad lang maoy ilang nadakpan ug nakulatahan.
Sigun pa ni Misuari nahunong lang ang pagpangulata dihang naabot ang mga barangay tanod ug gidala kini sa Carcar District Hospital dayon gipaslak sa selda sa kapulisan.
Nasayran nga P70 ra diay ang nakuha sa suspek gikan sa tindahan nga gisud sa usa ka pitaka , samtang ang laing pitaka nga iyang nadala way sud. (BANAT NEWS)