Clearing operation gisugdan

CEBU, Philippines - Gisugdan na sa kagamhanan sa Dakbayan sa Sugbo ang clearing operation sa Sitio Puntod ug Abaya sa Barangay Mambaling human kini naigo sa sunog niadtong nakalabay nga semana diin singkwenta ka mga panimalay ang hingpit nga naugdaw.

Matud pa ni Jojo Labella, nga maoy gitahasan sa paghitsa sa maong lugar nga nagsugod na sila og clearing operation niadtong adlaw nga Sabado.

Sumala pa niya karong buntag, kadtong mga biktima sa sunog ug ang nanimuyo sa lugar nga wala kaayo maapektahi magtagbo sa 9th floor sa executive building sa Cebu City Hall aron tukion ang mga posibleng pagabuhaton sa lugar.Gibutyag ni Labella, ilang ibalik kung unsay kanhi dagway sa maong lugar  apan adunay mga kausaban ilang ipatuman tungod kay naghuot na man ang lugar. Ang pangulo sa Prevention Restoration Orderly Beautification Enhancement (PROBE) Racquel Bohol-Arce nibutyag sa Banat News nga nireklamo ang kabomberohan atol sa pagresponde tungod kay huot kaayo ang dalan.

Matud niya, adunay himuong road restoration sa mga dalan sa maong dapit kay gipangtukoran na man ang mga kilid niini og mga estraktura maong nigamay ang dalan ug lisud alang sa mga emergency vehicles ang pagsud.  (BANAT NEWS)