54 ka illegal fishers gikasohan sa DENR

CEBU, Philippines – Miabot na og 54 ka mga tawo ang gipasakaan og kaso sa Department of Environment and Natural Resources (DENR)-7 gumikan sa illegal nga pagpangisda sa Tañon Strait Protected Seascape(TSPS) sukad niadtong Septiyembre hangtud sa buwan sa Oktubre.

Nasakmit usab ang upat ka fishing boats gikan kanila human sa gihimong joint seaborne operations sa DENR-7 ug Bureau of Fisheries and Aquatic Resources (BFAR)-7 lakip na usab sa kapulisan.

Ang mga nasikop pasakaan og kasong kalapasan sa Section 20 sa Republic Act 7586 kon National Integrated Protected Areas System (NIPAS) Act of 1992.

Ang mga panagatan anaa na karon sa kustodiya sa TSPS nga naglangkob sa FB San Vicente Ferrer, Sto. Niño, Blue Heaven ug Adianne.

Base sa RA 7586, ang masikop mahimong makamulta gikan sa P5 mil hangtud P500 mil ug pagkapriso sulod sa usa ka tuig hangtod sa unom ka tuig.

Sa dugang kalamposan batok illegal fishing, unom ka kahon nga pinabuthang isda ang nasakmit sa Anti-Illegal Fishing Task Force sa probinsiya niadtong Miyerkules sa gabii diha sa Barangay Cotcot, lungsod sa Liloan.

Si Chad Estella, coordinator sa task force nagkanayon gikan sa Cawayan, Masbate ug paingon ihatud sa Barangay Pasil, Dakbayan sa Sugbo.

Ang maong isda nga giingong pinabuthan gilangkuban sa mamsa, kubal-kubal, banak (Ludong) ug talakitok.

 Matud ni Estella nga sa gipahigayong operasyon 38 ka kahon sa mga isda lakip na niini ang unom ka kahon nga pinabuthan nga gikarga sa Mitsubishi truck nga dunay temporary plate nga 122609.

Nasakpan sa fish examiner ang 482 ka kilo ang pinabuthan o nakuha pinaagi sa “dynamite fishing” samtang ang 540 ka kilo nga di pinabuthan giuli ngadto sa tag-iya. Ang lima ka mga tag-iya sa maong mga isda gikatakdang pasakaan og kalapasan sa Akta Republika 10654 amending Republic Act No. 8550 o  Philippines Fisheries Code of 1998. (BANAT NEWS)