CEBU, Philippines - Si kanhi mayor Tomas Osmeña miawhag sa Ombudsman nga imbestigahon si Mayor Michael Rama sa kwestyonable niini nga pagsulod og kontrata alang sa pagtukod sa bag-ong Carbon Market Unit II.
Matud ni Osmeña nga klaro kaayo ang kalapasan nga nahimo ni Rama kay ang iyang administrasyon nakigkontrata sa Geety Realty and Development Corporation alang sa P167 milyones nga proyekto.
Nakakuha og dukomento si Osmeña nga ang Geety Realty and Development Corporation wala tuguti sa Philippine Contractors Accreditation Board nga makasulod og kontrata alang sa mga proyekto nga subra sa P50 milyones.
Si Osmeña mipadala og suwat ngadto ni Rama nga nagpakisayod kun ngano nga nalangan ang pagtukod sa Carbon Market Unit 2 bisan og ang proyekto nagahinan na og pundo nga P167 milyones.
Ang mayor igo lang mitubag nga ang suwat ni Osmeña nga nagpakisayod kabahin sa katukoran sa Carbon Market Unit 2 giduso na sa City Legal Office ug wala makontento niini ang kanhi mayor. (Rene U. Borromeo)(BANAT NEWS)