14 nigamit og ‘hanger’ sa panagat sikop

CEBU, Philippines - Gidakop sa kapolisan sa Lungsod sa Madridejos ug Bantay Dagat ang 14 ka mananagat human nasakpan nga ilegal nga nanagat pasado alas 4 sa nakalabay nga hapon.

Matud ni Police Officer 2 Orlan Alico, desk officer sa Madridejos Police Station, nga nahinabi sa Banat News nga nigamit ang mga mananagat og “hanger” nga gidili ug wala usab sila’y permit alang sa pagpanagat.

Ang mga dinakpan pulos taga Barangay Patao ug Baod, Lungsod sa Bantayan kinsa nisulod sa kadagatan sa Madridejos.

Unom ka panagatan ang nasakmit nga naglakip sa mga gamit nila nga mga pukot.

Sumala pa ni Alico nga daghang mananagat ang mosulod sa ila’ng munisipalidad kay abunda man sa isda ang ila’ng kadagatan.

Gawas sa multa nga tag P2,500 matag usa, pasakaan pa gyud og kaso ang mga dinakpan. (BANAT NEWS)