PRO-7, DOE batok LPG butane
CEBU, Philippines - Andam motabang ang Police Regional Office-7 sa Department of Energy sa kampanya batok sa ilegal nga pag-refill sa butane canister og liquefied petroleum gas (LPG).
Kini human si DOE-7 Director Antonio Labios nibisita sa buhatan ni Chief Supt. Prudencio “Tom” Bañas aron hisgutan ang isyu.
Alang ni Bañas ang pag-umol og task force alang sa katuyuan ang labing maayo nga buhaton aron mahatagan og pagtagad ang isyu.
Ang kapolisan motabang sa pagpangronda sanglit ang DOE ang may mandato sa pagpatuman sa balaud labot niini.
Sumala pa ni Labios nga mokabat sa P60,000 ang multa alang sa matag kalapasan ug wala pa’y labot sa posible’ng kaso’ng kriminal.
Gipasabot ni Labios nga ang butane canister gihimo ug pwede lang gamiton usa ka higayon diin mamahimo na’ng delikado kung i-refill sa LPG basin mobuto.
“One time use lang ni siya (butane canister) ang pag-refill ana kay illegal kay dangerous risk na siya kay ang butane mas gamay og pressure kumpara sa LPG, dunay posibilidad nga mobuto,” matud ni Labios.
Gipasalamatan ang kagamhanang lokal sa Dakbayan sa Sugbo pinaagi sa City Disaster Risk Reduction and Management Office nga mohimo usab og task force aron mag-monitor sa pagpapas sa mga mamaligya sa butane nga LPG ang sulod.
Ang task force langkuban sa Department of Trade of Industry, Bureau of Fire Protection, Philippine National Police ug kagamhanan sa dakbayan. (BANAT NEWS)
- Latest
