CEBU, Philippines – Gilingaw sa mga tinun-an sa Grade 8 sa St. Joseph's School of Mactan ang 50 ka street children sa Dakbayan sa Sugbo ubos sa ilang Outreach Program, Kapatiran Exposure Activity sulod sa University of San Carlos Main Campus Gym.
Nagkadaiyang games ang gipaambit sa mga tinun-an ngadto sa mga bata ug ang pagdungan og kaon sa snacks nga giandam.
Matud ni Krystal Nudalo, usa sa mga tinun-an, nitug-an sa Banat News nga bisan anaa sila sa maayo’ng estado sa pagpuyo, gusto gihapon nila’ng makigsandurot sa mga bata nga naa sa kadalanan aron usab masayran nila ang mga problema niini nga giatubang sa matag adlaw ug unsa’y mahimo usab nila isip mga tinun-an. Damgo ni Nudalo nga hatagan og focus sa Ginoo ang kabatan-onan nga mao’y damgo sa nasud ug dili lang mo-focus sige sa economic progress.
Si Federico Vecina, assistant outreach coordinator, nibutyag sa Banat News nga parte sa ila’ng integral formation sa mga tinun-an ang outreach program matag tuig diin nakig-alayon sila ni Bro. Paul Bongcaras, SVD, usa sa mga nagtutok sa kahimtang sa mga bata’ng libud-suroy aron mahimo’ng makauban sa mga tinun-an sulod sa usa ka adlaw.
Sumala pa ni Vecina nga sa mao’ng outreach program, ang mga bata makat-on sa tinud-anay nga estado ug kahimtang sa mga bata samtang ang mga bata makakat-on usab og kaalam gikan sa mga tinun-an nga mopaambit usab sa ila’ng kahibalo.
Gibutyag ni Vecina nga malaumon sila nga daghan sila’ng maabot nga mga bata nga mapaambitan sa ila’ng Kapatiran kauban ang mga tinun-an. (BANAT NEWS)