CEBU, Philippines – Napaig ang usa ka 71-anyos nga lolo human nga naugdaw ang iyang balay diha sa Barangay Tomonoy sa lungsod sa Moalboal sa miaging adlaw. Wa na masalbar pa sa iyang mga silingan si Dionisio Omagac, tungod kay di na masungasong ang kalayo sa sulod sa balay niini.
Si Omagac giingong hinay nang molakaw tungod kay nakaagi na kini og stroke ug siya rang usa ang nahibilin sa iyang balay niadtong tungora kay ang iyang asawa nga Emersiana, 69, milakaw padulong sa balay sa ilang anak.
Nasuta sa imbestigasyon sa kabomberohan nga nagsugod ang kalayo pasado alas 11 sa buntag ug dali ning mikatap sa ilang balay samtang ang biktima diha sa ilang lawak.
Gikatahong kalit misilaob ang atop sa ilang balay ug ang ilang mga silingan misulay pa unta og tabang kaniya aron hulboton kini gikan sa bungbong sa balay apan paspas kaayo ang pagkatap sa kalayo.
Ang kabomberohan nagtoo nga electrical short circuit ang hinungdan sa maong sunog ug gibanabana nga moabot og P10 mil ang danyos niini.
Samtang gibanabanang mokabat P150mil ang danyos sa sunog nga niigo sa Sitio Matumbok, Barangay Pusok sa Dakbayan sa Lapu-Lapu.
Ang naugdaw nga panimalay ila ni Renante ug Francisco Melicor ug gituohang electrical misuse ang hinungdan niini. Giisa kini dayon sa 2nd alarm ug nakontrolar paglabay sa 15 minutos.
Matud pa ni Fire Officer 1 Jopet Obieña, walay naangol o nakalas sa maong sunog.
Si Renante Melicor sa iyang bahin nibutyag nga nagtan-aw sila og T.V dihang nakadungog siya nga dunay nisyagit sa gawas sa ilang balay nga adunay sunog.
Dali silang nanggawas apan dako niyang kakurat nga paglili niya ang ila diay ikaduhang andana ang nasunog ug dako na kaayo ang kayo.
Sumala pa ni Melicor, bugtong T.V ug sakyanan lang ang iyang nadala tungod kay paspas ug dali kaayo ang maong panghitabo.
Nagtuo si Melicor nga gikan sa pikas balay ang sunog nga iyang gipaabangan kay wa may tawo sa ilang ikaduhang andana niadtong tungora.
Si Kapitan Caridad Dawat nisusi na kun pila ang mga apektado sa maong sunog aron ilang matabangan. (BANAT NEWS)