Mandaue nangutang og P500M sa DBP

CEBU, Philippines - Nangutang ang kagamhanan sa Dakbayan sa Mandaue og P500 milyones sa Development Bank of the Philippines alang sa katukuran sa bag-ong merkado publiko sa karaang nahimutangan niini luyo sa   National Shrine of Saint Joseph.

Si City Treasurer, Atty. Regal Oliva, nipasabot nga ang mao’ng kantidad nga utangon lakip na sa giduso sa committee on finance sa konseho. Matud ni Oliva nga P400 milyones ang nahauna’ng sugyot nga utangon apan tungod sa mga kausaban mao’y hinungdan sa pag-usbaw sa kantidad ngadto na sa P500 milyones.

Adunay igo’ng kapasidad ang kagamhanan sa dakbayan sa pagbayad sa utang hinungdan nga giaprobahan usab dayon sa DBP ang utang.

Target sa kagamhanan ang P1.8 bilyones nga kitaon sa dakbayan sunod tuig diin lakip niini ang makolekta nga buhis ug ang  tinuig nga P500 milyones nga Internal Revenue Allotment (IRA).

Gitinguha sa kagamhanan ang pagbalik sa merkado sa karaang nahimutangan aron pagdasig sa mga manindahay. (Romeo T. Limpangog/GMR)(BANAT NEWS)