Hain man ang job order employees?

CEBU, Philippines - Giawhag ni Konsehal Aldin Diaz sa siyudad sa Talisay si Mayor Johnny de los Reyes aron pagduso sa mga pangalan sa job order workers nga wala pa makadawat sa ilang suweldo gikan sa buwan sa Agosto ngadto sa Oktubre.

Si Diaz nagkanayon nga mao kini ilang basehan paghatag sa saktong budget nga gipangayo sa mayor ug aron makita usab nila ang kinahanglang korihian sa ikaupat nga supplemental budget nga iyang gipangayo.

Siya nakapangutana kun nganong nangayo gihapon og laing budget ang mayor para sa sweldo sa job order workers nga nagahinan na man kini og budget sa ikaduha ug ikatulo nga supplemental budget nga gipangayo gihapon sa mayor.

Apan si JVR nisaway sa lakang ni Diaz ug sa mga sakop sa konseho gumikan sa paglangay sa iyang gipangayo nga supplemental budget.

Sa nasayran, giaprubahan sa konseho ang kapin sa P33.4 milyones nga ikaduhang supplemental budget sa mayor niadtong buwan sa Abril samtang P28 milyones  sab para sa ikatulong supplemental budget sa buwan sa Agosto.  Sigun pa ni Diaz nga nagpatuyang lang pag-hire og job order ang mayor bisan apike sa budget ang siyudad.

Si Diaz niingon nga atol sa ilang caucus si Edgar Mabunay, kinsa maoy city budget officer nibutyag nga ang ikaduha ug ikatulo nga supplemental budget ang makasarang na sa pagsuweldo sa mga job order hangtud sa katapusang buwan sa tuig.

Ang supplemental budget no. 4 nga gipangayo sa mayor P74.1 milyones ug ang P9.1 milyones niini alang sa suweldo sa 500 ka job order workers gikan sa buwan sa Agosto hangtud sa Disyembre.(Gabriel Bonjoc/EIM)(BANAT NEWS)