CEBU, Philippines - Mas grabe pa nga huot sa trapiko ang masinati sa dakbayan sa Mandaue sa mosunod nga mga buwan nunot sa pagsirado sa bahin sa dalan Plaridel lahos na sa Ouano Avenue sulod sa 330 ka adlaw.
Kini nunot sa pagpatuman sa dugang P129 milyones nga pagsemento sa karsada sumpay sa kasamtangang gitrabaho nga nakaingon sa kahuot sa dagan sa mga sakyanan.
Matud ni Marie Nillama, information officer sa Department of Public Works and Highways-7, nga niadto pa unta’ng Agosto ang pagpatuman sa proyekto apan giuktaba tungod sa Asia-Pacific Economic Cooperation (APEC) meetings sa Sugbo.
Si Glenn Antigua, executive officer sa Traffic Enforcement Agency of Mandaue (TEAM), niingon nga muhimo usab sila og rerouting sa mga sakyanan.
Usa ka lane sa sirad-an nga karsada ang paagian samtang trabahoon ang pikas lane.
Ang dalan M.C. Briones mao’y mahimo’ng alternatibo’ng kaagian sa mga sakyanan gikan ug paingon sa norte ug sa dakbayan sa Lapu-Lapu. (BANAT NEWS)