CEBU, Philippines - Nahinayon gyud ang pagguba sa 29 ka panimalay sa Barangay T. Padilla bisan suway nga gihangyo ni Bise Mayor Edgardo Labella ang tag-iya sa luna nga si Virginia Villa.
Hangyo ni Labella nga hatagan og panahon ang kagamhanan sa dakbayan sa pag-develop sa yuta nga kabalhinan sa mga residente apan wala nisugot ang tag-iya sanglit napulo ka buwan na ang iya’ng gihatag nga lugway.
Gipapirma ang tanang apektado og undertaking ug gidala ngadto sa korte aron paghangyo nga hatagan og panahon hangtud human sa Pasko.
Gipasabot ni Labella nga dili siya kapugong sa sheriff sa pagpahunong sa pagguba sa kabalayan tungod kay igo lang kini nagtuman sa mando sa korte.
Gipasalig ni Labella nga andam na ang kwarta aron pagbayad sa relocation site sa Santa Ana, Binaliw apan kinahanglan pa nga i-develop ang dapit.
Gimanduan ni Labella ang mga opisyal sa Barangay T. Padilla nga ipahiluna ang mga pamilya sa sports complex ug sa mga duol nga tunghaan.
Hatagan usab og ayuda ang mga biktima og pakan-on usab sila sa Department of Social Welfare and Services. (BANAT NEWS)