Kalag sa bata nagpabatyag

CEBU, Philippines - Subling giablihan sa Criminal Investigation and Detection Group-7 ang imbestigasyon sa kaso bahin sa 9-anyos nga batang babaye nga gikatahong nalumos sa lim-aw sa Barangay Binaliw ning dakbayan sa Sugbo niadtong Oktubre 22 ning tuiga.

Kini human nga matud pa adunay nakita ang mga imbestigador nga dili katuohang mga detalye kabahin sa pagkalumos niini niadtong adlawa human nila gisubay pagbalik ang lugar tungod sa hangyo usab sa mga ginikanan sa bata.

Sa wala pa buhata sa CIDG-7, si Joey, amahan sa namatay nga si Jiecel Codeniera , tinun-an sa Grade 4 sa Binaliw Elementary School, miduol kanila ug nagpatabang nga imbestigahon pagbalik ang kamatayon sa ilang anak. Matud pa daw gipaminaw sa ilang anak ang ilang hangyo kaniya nga pakitaan sila og mga senyales nga mamahimong giya nila aron mahatagan kini og hustisya kay sa sinugdanan pa lang dili sila motuo nga nalumos lamang kini.

Daan na siyang nagdudang adunay foul play sa kamatayon sa anak kay aduna kini daghang bun-og sa iyang lawas. Samtang nag-vigil sila niini, kalit nga mihuros ang kusog nga hangin ug iyang nakita ang gihipos nilang bag sa iyang anak apan naabli na kini. Dihang iyang gisusi ang bag, nabasa ang sud niini maong ilang gitan-aw ug ilang nakita ang usa ka notebook nga adunay mga drawings.

Sa notebook ni Jiecel dunay drawings ug sketches sa susama og sapa nga adunay tawong naglaba ug duna’y nakabutang nga X nga  nagtumbok sa lugar diin nakita ang lawas sa bata.

Adunay gisuwat sa sketch nga “Mama, Mama, Mama, Hay Ma, I love you Mama, Maaaa” nga sa ilang pagsabot daw sa nangayo kini og tabang. Aduna sad kini sketch sa nawong sa tawo nga gibutangan og pulong nga “bad” sa ibabaw niini.

Sa laing panid,  adunay suwat nga pangalan sa lima niya ka classmates nga kauban niya sa lim-aw atol sa hitabo ug aduna say pulong gibutang nga “bad” ug “save” nga gisulat sa kilid sa mga pangalan.

Apan ang mga imbestigador nagtuo nga hinimo-himo ra kadto bisan miinsister ang amahan nga agi kadto sa sinuwatan sa iyang anak.

Ang officer in-charge sa CIDG-7, Supt. Marlon Tayaba miingon nga ila nang giadto ang lugar niadtong Martes ug nakakita sila nga adunay posibilidad nga gipatay ang bata. Sumala pa ni Tayaba, mabaw kaayo ang dapit diin gikatahong nalumos ang bata ug di katuohang malumos kini didto. “And if malunod man ‘yung bata, hindi pwedeng ma-recover ‘yung bangkay niya upstream. Meaning, mula duon sa nakitang naliligo siya, hindi pwedeng ma-recover ‘yung bangkay sa taas,” sigun pa ni Tayaba.

Aduna na sila’y  “person of interest” nga gisubay sa kaso.  (BANAT NEWS)