CEBU, Philippines – Gihulagway sa mga kapitan sa dakbayan sa Talisay nga nagkadaghan na ang ilegal nga swertres apan wala’y bisan usa nga nasikop.
Si Kapitan Raul Cabañero, presidente sa Association of Barangay Councils sa siyudad, ang nipatawag og special session karong adlawa aron pagtuki sa isyu.
Lakip sa ila’ng gipatawag ang presensya ni Mayor Johnny de los Reyes, Department of Interior and Local Government, chairman sa committee on peace and order sa konseho ug ang taga Licensing Department.
"Nagpatawag gyud mi og special session kay grabe na ka rampant ang ilegal swertres sa ato’ng siyudad," matud ni Cabañero.
Matud pa ni Cabañero nga sila sa barangay ang adunay katungod sa pagsikop niini’ng matang sa ilegal nga kalihukan apan sila nanagana tungod sa ila’ng seguridad hinungdan nga sila nangayo og abag sa ubang ahensiya sa gobiyerno.
Usa ka kapitan nga dili magpaila ang niingon nga adunay usa ka operator sa ilegal swertres ang nibutyag nga dili na lang sila hilabtan tungod kay daku na sila og bayad sa nagpatuman sa balaud.
Giangkon ni Cabañero nga aduna’y niduol kaniya nga operator sa ilegal swertres nga sila dili hilabtan kay kini ila’ng panginabuhi apan iya kini’ng giprangkahan nga ang ila’ng negosyo usa ka ilegal.
Nanghinaut si Cabañero nga human sa ila’ng panagtigum hayan makakita sila og tubag sa ila’ng mga yangungo. – /GMR) (BANAT NEWS)