Wa atimana namatay

CEBU, Philippines – Nagbangotan karon ang pamilya sa kapin usa ka tuig nga batang babaye nga gipasangil nga namatay tungod sa pagpasagad sa mga kawani sa Minglanilla District Hospital.

Gihaya karon sa ilang panimalay si Mary Jane Bariquit, taga sitio White Sand, barangay Tuyan sa dakbayan sa Naga nga namatay niadtong Nobiyembre 6 tungod sa pagsuka-kalibang.

Matud pa sa apohan sa bata nga si Juanita Bariquit, gidala ang iyang apo sa inahan niini alas-10 sa gabii tungod kay nagmulo ang bata ug human gisukit-sukit didto sa tambalanan gihatagan sila og resita.

Dali unta siyang miadto sa botika apan P700 ang kantidad sa tambal nga gipapalit. Nihangyo siya sa botika nga iya lang ibilin ang iyang relo ug ang P200 ug lukaton lang  pagkaugma basta mahatagan lang og tambal iyang apo, apan wa mosugot ang nagbantay.

Mibalik siya sa tambalanan ug niesplikar apan gikatahong giingnan siya sa iyang nakaestorya og "Dili na akong problema, gawas mo!"

Tungod kay wala man gyud sila atimana ug giabog na man sila sa tambalanan nigawas sila dala iyang apo.

Apan dihang anaa na sila sa gawas adunay managtiayon nga nagpakisayod kanila tungod kay nagsige na man sila og hilak kay lain na ang ilang tan-aw sa iyang apo.

Ang wa nila mailhing magtiayon niboluntaryo pagtabang kanila ug maoy nipalit sa maong tambal.

Sa usa ka Facebook account sa usa ka Apple Arcaniel Soberano adunay gi-post niini nga: “Nakit an nku iyang Mama sa gawas hospital nghilak iyang anak nagtinga na aku siyang gapangutana na unsa mana ate iya kung gitubag gipagwas m ky wala m kwarta Mam..murag gikomot akung dughan sa kasakit..sahi pud duna koy anak..na babae akung g away ang doctor aku g ingnan na doc.nagtinga na ang bata dli ninyo atimanon inyong gipagwas ni Ana ra ang doctor.na wala man sila naka palit og dextros og dagom ang bata nang lagum na..ayha pa sila nanglihok tanan ilang gitrapohan og basa,” matud pa sa post.

Apan dihang napalit na kini (dextrose) wala gihapon kini mataod sa mga nurse kay naglisod sila pagpangita sa ugat niini hangtud nga nakabsan na lang gyud kini sa kinabuhi.

Ang apohan sa bata bisan wala matabang iyang apo dako kaayo og pasalamat sa magtiayon nga nitabang kanila. Ang inahan sa bata nga si Jessie Bariquit nibutyag sa Banat News nga dako kaayo ang iyang pagmahay sa maong tambalanan kay pait gyud kung pobre ang usa ka tawo kay dili gayud matagad.

Dili siya motoo nga walay tambal ang maong tambalanan, sumala pa niya kun gidapatan lang dayon og tambal iyang anak mabuhi pa kini ug bahala na og madiin-diin sila pagpangita og kwartang ikabayad kay mas importante man ang kinabuhi.

Tungod sa kapobrehon ug walay ikasukol, ihangad na lang niya ang tanan ngadto sa Kahitas-an ang pagpangayo og hustisya para sa iyang anak. Matud pa niya nagtuo gyud unta siya nga matabangan iyang anak sa public hospital tungod kay sila kabos.

Karong adlawa gikatakda nilang ihatud sa kataposang pahulayan ang iyang anak.  Ang Banat News miadto sa Minglanilla District Hospital kagabii aron makuhaan sila og pamahayag bahin sa nahitabo sa bata apan ang gwardiya nagkanayon nga wala diha ilang chief of hospital. – /EIM) (BANAT NEWS)