CEBU, Philippines - Gawas sa problema sa dokumento sa yuta, gitumbok sa National Housing Authority nga ang bangi sa politika sa mga opisyal sa usa ka lungsod nga apektado sa bagyo’ng Yolanda ang nakalangan sa ila’ng proyekto.
Kini ang gipadayag ni Eng. Constancio Antinegro sa NHA-7 atol sa kalihukan sa Kapitolyo kagahapon diin gituki ang mga nahimo sa gobiyerno human sa duha ka tuig nga niigo ang bagyo.
Matud ni Antinegro nga dunay mga lungsod nga ang mayor ug mga sakop sa konseho kontra-partido ug malangan ang proyekto tungod kay lisud-lisuron ang pag-isyu sa mga certificates nga gikinahanglan sa contractor.
Ang NHA ang gitahasan sa permanent housing project sa 16 ka local government units (LGU) nga apektado sa Yolanda.
Matud niya nga nagsugod sila sa ila’ng proyekto sa mainland nga gilangkuban sa mga lungsod sa Borbon, Sogod, Tabogon, Tuburan, Tabuelan, San Remigio, Medellin, Daanbantayan ug dakbayan sa Bogo.
Sa Borbon, adunay tulo ka ektarya’ng luna nga tukuran og housing project alang sa 400 ka pamilya. Sa Sogod wala pa’y na-identify nga site.
Sa Tabogon ubos kini sa community-base shelter and livelihood ug ang beneficiary niini ang 184 ka pamilya ug ang site gisusi pa kini sa NHA ug nakig-coordinate sila sa mga beneficiaries.
Sa Bogo aduna’y duha ka sites sa barangay Taytayan apan giingon ibalhin kini sa likod sa City Hall.
Sa Tuburan adunay 170 ka beneficiaries ubos sa community-base shelter and livelihood.
Sa Tabuelan, gisugdan na ang katukuran sa 220 units nga mga balay sa barangay Olivo.
Ang land development sa mao’ng relocation site nagpadayon.
Sa San Remigio nasugdan na usab ang katukuran sa 680 ka units sa balay. Gawas niini ang NHA duna pa’y laing relocation site nga giila alang sa 544 ka beneficiaries.
Sa Medellin nasugdan na usab ang katukuran sa 631 ka balay ug padayon pa usab ang land development ug nangita pa usab og laing site ang NHA alang sa 569 units.
Sa Daanbantayan, naa ang Maya Park Homes sa barangay Maya nga adunay gilapdon nga 5.4 ektarya ug tukuran kini og 650 ka units.
Matud ni Antinegro nga sa Daanbantayan aduna’y unom ka sites tungod kay ang allocation sa Daanbantayan nikabat ngadto sa 4,383.
Ang ubang sites ubos pa kini sa negosasyon sa developer ug duna pa’y mga rekisitos nga tumanon. Sa isla sa Bantayan, ang Santa Fe aduna’y tulo ka sites samtang sa lungsod sa Bantayan nasugdan na ang 450 ka units nga nahimutang sa barangay Kabak.
Sa isla sa Camotes, matud ni Antinegro nga naghuwat pa sila sa resulta sa paglibkas sa reservation sa lugar. (Brenda D. Batuto/GMR)(BANAT NEWS)