CEBU, Philippines - Nakadawat og pasidungog gikan sa direktor sa kapulisan sa Police Regional Office-7 ang duha ka polis nga naangol apil na ang ilang kaubang nakabsan sa kinabuhi didto sa lungsod sa Catmon niadtong nakalabay nga semana.
Si Chief Superintendent Prudencio “Tom” Bañas mihatag sa Medalya ng Sugatang Magiting ngadto ni Senior Police Officer 2 Rex Menchavez ug Police Officer 2 Aaron Arizo sulod sa usa ka pribadong tambalanan dinhi sa siyudad sa Sugbo diin sila nagpaalim sa ilang samad pinusilan.
Samtang posthumous award usab ang gihatag alang ni Police Officer 2 Dionelio Jurbina nga napatay sa maong engkwentro batok sa grupo sa mga armadong lalaki nga ilang gisitar.
Si Bañas miingon nga ang maong pasidungog ihatag lamang ngadto sa mga polis nga mihimo sa ilang trabaho nga walay pagduhaduha.
Niadtong Domingo ang kalihim sa Department of Interior and Local Government Sec. Mel Senen Sarmiento personal nga mibisita sa duha ka mga polis nga naangol ug sa haya ni Jurbina didto sa Catmon.
Gani matud pa natandog si Sarmiento sa pamahayag sa 11 anyos nga anak ni Jurbina nga usa ka babaye nga gusto usab mahimong polis parehas sa iyang amahan.
“Nag-ingon siya nga di na siya mohilak kay kahibawo siya that his father died as a hero,” saysay pa ni Bañas.
Aron matuman ang pangandoy sa anak ni Jurbina misaad si Sarmiento nga tabangan ang bata nga makahuman sa iyang pagtungha ug makab-ot iyang pangandoy.
Kahinumdoman Miyerkules sa gabii sa nakalabay nga semana didto sa sitio Buyo, Binongkalan miresponde ang maong mga polis sa alarma sa giingong armado nga tawo.
Apan sa dihang giduol ni Jurbina kalit kini gipusil diha sa ulo sa kauban sa maong lalaki nga nagpahipi sa kilid sa karsada ug nahitabo na ang sinukliay sa bala nga miresulta sa kamatayon sa duha ka mga suspetsado nga sila si Lito Gumulon ug King Siroy Porgatorio Lusifer samtang nadakpan ang ilang mga kauban nga sila si Andrew Ocasla ug Tomas Bracero. (Jojo C. Ugdol/EIM)(BANAT NEWS)