Nanigbas maoy naunay sa iyang pinote
CEBU, Philippines – Usa ka trisikad drayber nga nanigbas unta sa iyang kontra mao na hinuoy nalandig sa tambalanan human giunay kaniya ang iyang pinote human siya nadis-armahan sa iya untang tigbason.
Ang insidente nahitabo sa sitio Ilang-Ilang, barangay Lagtang, dakbayan sa Talisay niadtong Sabado sa gabii diin usa ka Jonrel Serbado, 21, nga taga sitio Crasher, barangay Lawaan III ang natigbasan.
Samtang ang suspetsado nga mitahan sa iyang kaugalingon nailhan nga si Jessie Pancho, 38, taga sitio Santa Catalina, barangay Bulacao.
Matud pa ni Police Officer 3 Oliver Ortega, imbestigador sa Talisay City Police Station nga nagsakay og trisikad ang suspetsado padung nga mopauli sa dihang siya gibabagan sa biktima nga armado og pinote.
Sumala pa nga way daghang estorya, gitigbas sa biktima ang suspetsado apan bisan giunsa niya kini paghapos sa pinote wa gyud siya makaigo niini hangtud nga siya na hinuoy nadis-armahan ug giunay pagtigbas kaniya ang maong hinagiban.
Maayong pagkagisi sa agtang, bukton ug kamot sa biktima hinungdan nga dali kining gidala sa Talisay City District Hospital.
Samtang ang suspetsado daling nisibat apan nitahan sa kapolisan paglabay sa pipila ka oras.
Nasayran nga dugay nang nagkabikil ang duha nga parehong drayber og traysikad tungod sa pag-ilogay sa pasahero ug di pa lang usab dugay gikulata sa suspek ang igsuon sa biktima. – /EIM) (BANAT NEWS)
- Latest
