CEBU, Philippines – Nagpusil sa iyang kaugalingon ang usa ka tanod atubangan sa iyang mga anak diha sa ilang balay sa barangay San Roque sa siyudad sa Talisay tungod sa pangabubho. Ang namatay mao si Ramon Pagobo, 50, nagpuyo sa nahisgutang lugar.
Si Police Officer 3 Oliver Ortega, imbestigador sa Talisay City Police Station nagkanayon nga nagbuntag og inom si Pagobo tungod sa iyang problema kay nagduda kining adunay karelasyong laing lalaki ang iyang asawa.
Sumala pa nga samtang si Pagobo diha sa ilang kusina, nikuha kini sa iyang .38 nga revolver ug mipatawag sa iyang 15 ug 14 anyos nga mga anak.
Matud pa ni Ortega gition ni Pagobo tumong sa iyang ulo ang armas ug gisuwayan siya pagpugong sa iyang mga anak apan gikablit gyud niini ang gatilyo ug nibuto kini hinungdan sa iyang pagkahagba ug namatay.
Asoy pa ni Ortega, nagproblema si Pagobo tungod sa iyang asawa nga iyang nasakpan nga adunay gikalingawang laing lalaki.
Narekober sa kapulisan ang .38 nga revolver ni Pagobo nga adunay duha ka mga bala ug usa ka empty shell sa tambor niini.
Nagtuo ang kapulisan nga ang problema ni Pagobo sa iyang asawa maoy nakapatukmod niya sa pagkutlo sa iyang kaugalingong kinabuhi . (BANAT NEWS)