Nanulis sa E-Bingo sa Mandaue nadakpan
CEBU, Philippines - Nadakpan sa mga sakop sa Regional Special Operations Group-7 sa Regional Intelligence Division ug mga sakop sa Tambulig Police Station sa Zamboanga del Sur ang usa sa mga suspetsado sa pagpanulis sa E-Bingo sa dakbayan sa Mandaue.
Ang dinakpan naila nga si Richard Daguman, alyas Tangkag, nga nadakpan sa iyang panimalay sa lungsod sa Tambulig.
Matud pa ni Superintendent Rex Derilo, hepe sa RID-7, human nila nadakpan ang unang duha ka mga kauban sa suspetsado nga sila si Mario Remetre niadtong Mayo 8 ug Ruel Remedios, niadtong Oktobre, 20 ning tuiga nakadawat dayon sila og impormasyon bahin sa lokasyon ni Daguman.
Ang Police Regional Office-7 nakig-alayon dayon sa kapulisan sa PRO-9 ug niresulta kini sa pagkasikop kang Daguman diha sa balay niini pinasikad sa duha ka warrant of arrest sa pagpanulis , usa ka warrant of arrest gikan sa dakbayan sa Dumaguete sa kasong pagpanulis ug sa pagpanulis sa E-Bingo sa Mandaue City.
Si Daguman gikatahong sakop sa dakong grupo nga Alferez-Monopollo Robbery Group sa Mindanao.
Gawas sa pagpanulis sa E-Bingo sa Dumaguete ug Mandaue City ang grupo ni Daguman ang gidudahang nalambigit usab sa mga pagpanulis sa mga bangko , pharmacy sa kaulohang Manila, Bacolod ug Tagbilaran City sugod pa niadtong tuig 2002.
Apan sa dihang nahinabi sa mga tigbalita si Daguman hugot nga milimod sa mga pasangil kaniya.
“Atubangon na lang nako nang kaso, wala gyud ko kabalo ana. Nakaari ko (Cebu City) pero gamay pa ko, bakasyon lang ba,” matud pa ni Daguman.
Aduna pay laing mga kauban ni Daguman sa grupo ang gipangita karon sa kapulisan. (Jojo C. Ugdol/EIM)(BANAT NEWS)
- Latest
