May CCTV footage pero hanap

CEBU, Philippines - Gitug-an sa hepe sa kapolisan sa siyudad sa Talisay nga nakuha nila ang pamay-ong sa mga suspek nga nibanhig sa sakyanan sa usa ka Customs collector sa sitio Nonoc, barangay Tabunok niadto’ng nilabay'ng adlaw.

Apan si Supt. Germano Mallari nagkanayon nga hanap kini ug nagtabon sa ila’ng dagway ang mga mamumuno pinaagi sa pagsul-ob og helmet.

Si Mallari niingon nga adunay usa ka establisemento sa lugar ang nakabutang og CCTV camera apan sayang lang tungod kay dili maklaro ang dagway sa mga suspek lakip sa plate number sa motor nga gisakyan.

Kini ang hinungdan nga siya nirekomendar nga kung magbutang og CCTV camera, kana’ng sakto og kalidad tungod kay mauli ra ang puhunan sa pagpalit niini kun adunay mga panghitabo.

Sa nasayran gipamusil sa duha ka sakay sa motor ang Toyota Hilux nga gisakyan ni Customs Collector Gerardo Campo, 55, taga sitio Sto. Niño, Nonoc-Tabunok.

Ang pagpamanhig niresulta sa pagkaangol sa drayber ni Campo nga si Proto Bulias, 38, taga Loon, probinsya sa Bohol. Swerte nga si Campo ang wala maigo sa pag-atake ingon man ang iya’ng staff sa opisina nga si Pablito Geraldez, 30, nga taga Cantao-an, Naga City.

Matud ni Mallari nga sila nagtuo nga si Campo gyud ang target sa mga mamumuno apan nasaypan lang kini nga siya gihapon ang nagmaneho sa sakyanan.

Sigun pa niya nga dili professional nga gun-for-hire ang namanhig.

Si Campo ang padulong na mopauli sa ila’ng panimaye diha’ng sila gipusil makadaghang higayon.

Naigo si Bulias sa buko-buko apan kini nakapadayun pa sa pagmaneho hangtud nga naabot sa panimaye ni Campo ug nakasibat ang mga responsable. Asoy ni Mallari nga padayun ang ila’ng pagpangita og testigo sa dapit. (Gabriel C. Bonjoc/GMR)(BANAT NEWS)