CEBU, Philippines - Kritikal ang kahimtang sa usa ka tawo nga biktima sa pagpamusil samtang naglingkod-lingkod sa tugkaran sa ila’ng panimalay sa sitio Cadastral, Looc, dakbayan sa Danao alas 7 pasado ang takna sa niagi’ng Huwebes sa gabii.
Si Police Officer 3 Nelson Pantoja sa Danao City Police Station niila sa biktima nga si Robert Matiga, 26, wala’y trabaho nga nagpuyo sa mao’ng dapit ug ang nagpusil mao ang duha ka wala hiilhi’ng lalaki nga nagsakay og motorsiklo.
Matud ni Pantoja nga human sa panihapon sa biktima nigawas kini sa ila’ng panimalay ug naglingkod-lingkod sa pagpahayahay sa iya’ng kaugalingon.
Dugang ni Pantoja nga nihunong ang motorsiklo sa atbang nga nahimutangan sa biktima ug kalit lang namusil sa makadaghang higayon sa wala matino nga hinungdan. Ang biktima dali nga gihatud sa Danao Provincial Hospital apan gibalhin sa Vicente Sotto Memorial Medical Center sa dakbayan sa Sugbo. (Romeo T. Limpangog/GMR)(BANAT NEWS)