Taiwanese nga nagdala’g armas gikasohan
CEBU, Philippines - Gipasakaan og kasong paglapas sa Republic Act 10591 o Illegal Possession of Firearms and Ammunition sa Aviation Security Group –7 ang 37 anyos nga Taiwanese (di Chinese nga maoy nigawas sa unang pagbalita) kinsa nakuhaan og mga armas samtang padung kini mosakay og abyon diha sa Mactan Cebu International Airport.
Ang maong Taiwanese mao si Chao Ching Hung kinsa gipasakaan og kaso kagahapon sa hapon sulod sa Prosecutor’s Office sa Lapu-Lapu City Hall of Justice.
Si Hung gipaubos og closed-door inquest proceedings ni Assistant City Prosecutor Dinah Jane Portugal diin gipresentar ang mga ebidensya batok kaniya.
Naglakip sa ebidensya mao ang iyang maleta nga maoy gisudlan sa KG-9 submachine pistol, duha ka magazines; usa ka Beretta 9 mm pistol ug usa ka magazine niini ug gatusan ka bala niini.
Ang armas giputos og plastik ni Hung ug giputos og balik og usa ka lead blanket una gisulod sa maleta niini. Ang mga armas walay dokumento.
Matud ni Police Officer 3 Bryan Cinco sa ASG-7, ang lead blanket gigamit ni Hung nga proteksyon sa mga kontrabando aron di makita sa x-ray machines sa Office of Transportation Security (OTS) sa MCIA.
Walay mitungang abogado ug walay interpreter nga nagrepresentar kang Hung atol sa inquest proceedings.
Sa laing bahin, nagkanayon si Police Senior Superintendent Joselito Salido nga nakadawat sila og komunikasyon gikan sa Taiwanese Embassy sa Manila.
“Meron nang print-out authorized Taiwanese law firm. Siya na ang mag-pili,” matud ni Salido.
Dugang ni Salido, susihon pa sa kapolisan kung asa gikan ang mga nakumpiskang armas ug mga bala ug kung miyembro ba si Hung og usa ka sindikato sa Taiwan.(Christell Fatima Tudtud/EIM)(BANAT NEWS)
- Latest
