Mayor Garcia balik opisina na
CEBU, Philippines - Nibalik na si Dumanjug Mayor Nelson Gamaliel Garcia sa katungdanan kagahapon human sa unom ka buwan niya nga pagkasuspenso nunot sa kaso’ng gipasaka ni Bise Mayor Efren Guntrano Gica.
Si Garcia pormal nga nipahibawo niadto’ng Miyerkules kang Gobernador Hilario Davide III nga mobalik na siya sa pwestyo.
Matud ni Garcia nga hapsay ang iya’ng pagbalik sa opisina kagahapon bisan gipugos niya sa pagpaabli ang pultahan sa iya’ng buhatan tungod kay giingong wala gihatag ni Gica ang yawe.
Una’ng gisusi ni Garcia ang budget alang sa 2016 tungod kay wala apili sa paggahin ang iya’ng buhatan samtang sa buhatan sa bise mayor adunay P27 milyones.
Niadto’ng Biyernes giingong napasar na ang 2016 budget sa lungsod ug matud ni Garcia nga ipasusi niya kini kung pila ang gisugyot nga budget.
Pasangil ni Garcia nga gidali-dali sa pagpasar ang budget bisan wala’y quorum ang konseho tungod kay lima lang ang nitungha ug ang upat ka konsehal absent ug wala’y majority vote.
Si Garcia nibahad sa pagsuwat sa hunta probinsiyal aron ipadeklarar nga “null and void” ang budget.
Si Gica sa iya’ng bahin nihimakak sa pasangil ni Garcia.
Iya’ng gipasabot nga sukad nga siya ang acting mayor, siyam ang sakop sa konseho nga gilangkuban sa usa ka presiding officer, usa ka ex-officio member ug pito ka regular nga konsehal.
Sa pag-aprobar sa budget, simple majority ang nitungha nga lima ka sakop ug na-quorum.
Ang majority sa lima tulo hinungdan nga napasar ang budget pinaagi sa mosyon ni Konsehal Antonio Garcia. (BANAT NEWS)
- Latest
