Lalaki nangangkong “gidauban”

CEBU, Philippines – Mohimo mas lawom nga imbestigasyon ang kapolisan kabahin sa usa ka lalaking nalandig sa tambalanan ug nangangkong gigapos, gibitay ug gisilaban sa mga lalaki ug babaye diha sa kabukiran sa Sudlon Uno, ning dakbayan sa Sugbo kagahapon sa buntag. Gibutyag ni Chief Inspector Michael Angelo Beltran, hepe sa Pardo Police Station nga usa ka Daniel Uy ang nangangkong gidaoban ug anaa karon sa Cebu City Medical Center.

Matud pa Marvin Decatoria, ang chief tanod sa barangay  sa Banat News dali silang miadto sa lugar human nila nadawat ang report, ug matud pa ilang nakita nga dunay grabeng kadaut sa buko-buko ug sa kilid sa lawas ug adunay mga garas sa tiyan si Uy maong ila kining gidala sa tambalanan.

Sumala pa ni Decatoria, si Uy nihapit sa ilang barangay hall alas-4 sa hapon niadtong Lunes kay duna kini giduaw nga usa ka babayeng nagpuyo didto. Matud pang Decatoria, si Uy nangangkon nga naglaba siya sa atabay nianang tungora dihang kalit lang kining giduol og tulo ka tawo ug gitabangan siya og gapos ug gibitay sa kahoy dayon gisilaban.Swerte nga nabugto ang pisi ug naligid siya sa ubos hangtud nga nakaikyas.

Apan sigon pa ni Beltran, si Uy nangangkon usab nga sakop sa usa ka Non Government Organization apan nasuko kaniya iyang mga kauban human sila migawas sa grupo.

"I-validate ni namo kay ang igsuon pud ani kay nihatag og background nga kun duna na siyay gusto nga dili matuman labi na og mabuwagan og uyab mo - attempt ni siya og hikog," matud ni Beltran.

Giadto sa kapulisan ang lugar diin matud pa nahitabo ang paggapos ug pagsunog apan walay nakitang lama o inagian sa sunog sa lugar.  – /EIM) (BANAT NEWS)