Davide: Gwen manubag sa CICC

CEBU, Philippines – Giinsister ni Gobernador Hilario Davide III nga manubag gihapon si kanhi gobernador, karon Kongresista Gwendolyn Garcia, sa giingong anomaloso’ng pagpatukod sa Cebu International Convention Center (CICC).

Kini bisan ang Korte Suprema nimando sa probinsiya sa pagbayad sa dugang P263.26 milyones nga utang ngadto sa WT Construction sa pagpahuman sa CICC.

Matud ni Davide nga wala pa sila kadawat sa kopya sa desisyon sa Korte Suprema.

Apan matud sa gobernador nga ang mao’ng desisyon wala magpasabot nga wala na’y tulubagon si Garcia.

Giklaro ni Davide nga si Garcia nag-atubang gihapon og kaso’ng administratiba ug kriminal sa Ombudsman may kalambigitan sa CICC.

Gipasabot ni Davide nga sa mao’ng desisyon sa Korte Suprema kabahin lang kini sa civil liabilities sa interest sa nasabutang kontrata tali sa contractor sa additional work sa CICC.

Dugang ni Davide nga kung makadawat na sila og kopya sa desisyon ila una kini’ng basahon ug posible’ng moduso sila og motion for reconsideration.  Sa laing bahin, si Bokal Peter John Calderon nipasabot nga ang Korte Suprema ug Court of Appeals nagkauyon sa pagpatuman sa unom ka porsiyento matag tuig nga interest imbis 12 porsiyento.

Si Calderon nagkanayon nga sa iya’ng kasayuran nabayaran na ang principal nga P257.41 milyones ug ang wala pa mabayari ang interest na lang nga P5.8 milyones.

Gipasabot usab ni Calderon nga ang probinsiya nilapas kini sa tukma’ng panahon kon “due date” sa pagbayad sa obligasyon ngadto sa contractor hinungdan nga gipabayad kini og interest subay sa Civil Code.

Sa iya’ng bahin, si Garcia nagkanayon nga ang desisyon sa Korte Suprema klaro kaayo nga wala’y nahimo’ng irregularities sa pagpatukod sa CICC.

Matud ni Garcia nga pipila na ka tuig ang nakalabay ang ilang kaatbang sa politika, ang giingong irregularities sa CICC ang gihimong puhunan nga unta wala man mapamatud-i nga adunay nahimo’ng kalapasan sa pagpatukod sa proyekto.

“Kun duna pa’y ilegal o kahiwian, ngano’ng pabayaran man?” matud ni Garcia.

Kabahin sa gibutang nga ‘Never Again” atubangan sa CICC, si Garcia nagkanayon nga, “yes, never again to an administration that would allow a people’s asset to rot because of political vindictiveness and hatred. Never again to do-nothingness, negligence and idleness masquerading as prudence,” – /GMR) (BANAT NEWS)