Epekto sa processed foods ipasabot

CEBU, Philippines – Giawhag sa hunta probinsiyal sa Sugbo ang Department of Health ug Department of Education sa pagpahigayon og lapad nga kampanya bahin sa epekto sa processed foods sama sa ham, bacon ug hotdog.

Kini gumikan kay ang maong mga pagkaon ang paborito sa kabataan ug kasagaran matag buntag mao’y andamon alang sa pamahaw.

Gitumbok sa hunta probinsiyal ang finding sa World Health Organization ang mga processed meat carcinogenic kini sama sa makuha sa pagpanigarilyo, gikan sa pesticides ug aso sa krudo. Nasuta nga adunay 18 porsiyento nga risgo sa colon cancer matag 50 gramos sa processed meat nga makonsumo nga buot pasabot nga kung magkadaghan ang makonsumo magkataas usab ang risgo sa sakit. Si Bokal Arleigh Sitoy nagkanayon nga ang mga bata nabutang sa risgo ang panglawas sanglit kasagaran sa kanila paborito’ng kaonon ang hotdogs.

Matud ni Sitoy nga angayan nga ipasabot sa DOH ug DepEd ngadto sa publiko ug sa mga estudyante ang pagtuon sa WHO. – /GMR) (BANAT NEWS)