Trabahante ni Uy gipaabot
CEBU, Philippines – Daghang pangutana sa kamatayon ni Agnelen Uy kung ang kapolisan makahinabi na sa laing duha ka trabahante sa iya’ng bana nga sakay sa awto sa wala pa mamatay ang biktima.
Kini sumala pa sa hepe sa Homicide Section sa Cebu City Police Office, Senior Inspector Alesandro Quijano.
Sumala pa ni Quijano nga dili pa gyud nila matahi ang mga panghitabo sa wala pa napalgi nga patay si Agnelen ug daghan pa kaayo’ng pangutana nga dili pa nila matino ang tubag.
Dugang pa niya nga sa tulo ka kauban sa magtiayon, usa pa lang ang nipatim-aw ug ikaduha na niini ang bana sa namatay.
Ang laing duha nga wala pa mahinabi sa mga imbestigador ang posible nga makadugtong sa mga oras ug panghitabo human sa pagkanaug sa duha ka trabahante ni Wayne Christopher Uy sa iya’ng awto.
Dugang ni Quijano nga gipahibawo sila nga nag-leave ang trabahante ni Uy ug tua sila sa Leyte nanguli alang sa kalag-kalag apan mobalik karong adlawa.
Nahinabi ni Quijano ang pamilya sa namatay ug matud pa niya nga sa pagkakaron ang pagpalubong sa patay nga lawas sa biktima ang ila’ng giatiman.
Dili pa sab makasulti ang igsuon sa namatay kung mopasaka ba sila og kaso kung duna na’y makita nga suspek ang kapolisan.
Dugang pa niya nga gihulat pa nila karon ang resulta sa paraffin test sa bana sa namatay ug sa usa ka “Roger” ug ang autopsy sa patay nga lawas. – /GMR) (BANAT NEWS)
- Latest
