Nagkuwang og barko

CEBU, Philippines – Daghang mga pasahero ang nangatanggong sud sa pipila ka oras diha sa mga pantalan dili tungod sa kadaotan sa panahon, kondili, tungod kini sa kadaghan sa mga pasahero ug kulang ang masakyan nila nga barko nga magdala kanila sa ilang mga destinasyon.

"Sa dami ng pasahero nagkulang yung mga vessels," matud pang Commander Enrico Efren Evangelista sa Coast Guard District Central Visayas kagahapon.

Matud pang Evangelista  miabot og 42 mil ka pasahero ang nibiyahe sugod alas-4 sa hapon niadtong Oktubre 30 hangtud sa alas-4 sa hapon  Oktubre 31 dinhi lang sa Central Visayas samtang aduna say nigikan sa rehiyon padung sa ubang rehiyon nga miabot og dul-an 16 mil ug ang nangabot dinhi miabot og kapin 9 mil.

Ang PCG nakainspeksyon na og 62 ka mga barko, pito ka motor banca ug 35 ka roll-on-roll-off nga barko sugod alas-6 sa gabii niadtong Oktubre 31 hangtud sa Nobiyembre 1 (kagahapon).

Dinhi lang sa pantalan sa Sugbo, nakatala ang coast guard og 13,255 ka pasahero ug ang 6,670 niini pulos nangabot dinhi.

"Situation was generally peaceful although there was a significant increase in the volume of maritime activity within the region. So far,  peaceful naman. We received no report of overcharging among vessel-bound passengers," pasabot pang Evangelista kinsa mipasidaan sa mga pasaheroan nga dili gyud mahimo silang mag-overloading aron way disgrasya.

" Yung ibang nag- overloading, pero pinababa namin yung mga pasahero at hindi pinayagang umalis ang barko until the desired number of passengers is achieved," pasabot pa niya.

Giandam usab daan sa PCG ang search and rescue vessels kun ugaling adunay aksidenteng mahitabo.

Samtang si Rey Elnar, regional director sa Land Transportation Franchising and Regulatory Board-7 mipahibalo nga nakapagawas sila og 78 ka special permits nga balido sud sa tulo ka adlaw alang sa mga bus pasaheroan nga gustong mogawas sa ilang rota gikan sa amihanan ug habagatang bahin sa Sugbo.

Ang Department of Transportation and Communication mipatuman na usab sa ilang Oplan Ligtas Biyahe: Undas 2015 alang sa luwas nga pagbiyahe sa mga pasahero.