CEBU, Philippines – Nagpusil sa iyang alingagngag ang usa ka abogado dihang i-serve unta sa kapolisan ang iyang warrant of arrest diha sa iyang panimalay sa barangay Taytayan, Bogo City sa miaging gabii.
Ang namatay naila nga si Atty. Amiel Joaquin Manubag, 34, CPA lawyer, nga may warrant sa kasong grave threat ug alarm and scandal nga giisyu ni Judge Dante Manreal sa Municipal Circuit Trial Court sa Bogo City. Si Police Officer 3 Eleymar Mendoza, nga nahinabi sa Banat News miingon i-serve na unta ang warrant sa iyang mga kaubanan sa Bogo City Police Station sa panimalay sa abogado.
Apan nagmagahi kini pagtahan sa iyang kaugalingon ug nilungtad na lang og tulo ka oras dihang gipagawas niini ang iyang kapuyo sa kwarto ug nangandado sa sud apan nadunggan na lang nila kini nga nagkanayon: “sud mo diri di ko magpadakop nga buhi di ko mahadlok nga mamatay kay dugay na kong patay.”
Sunod na lang nilang nadunggan ang usa ka sipang buto sa armas gikan sa kwarto maong gipugos nila kini og abli ug ilang nakita nga naghigda na kini sa kama ug nagkadugo. Patay na kini pag-abot sa Cebu Provincial Hospital. Nakuha sa crime scene ang usa ka .38 kalibre nga revolver nga gituohang maoy iyang gigamit pagkutlo sa iyang kinabuhi. (BANAT NEWS)