CEBU, Philippines - Nasunog ang storage room sa usa ka kompaniya sulod sa Mactan Economic Zone 1, sa Ibo, dakbayan sa Lapu-Lapu sa niagi’ng Miyerkules sa gabii tungod sa electrical short circuit.
Matud ni Engineer Nicanor Mametes, officer-in-charge sa Fire District sa Philippine Export Zone Authority nga anaa sa P800,000 ang gibanabanang danyos sa sunog nga nahitabo alas 9:55 sa gabii.
Mga tools ug electrical nga kahimanan ilabi na ang mga blueprints nga gipangsulod sa storage room sa engineering department sa Lear Corporation-Planta Gabriela, tighimo og mga electronic parts ug semiconductors.
Nakontrolar ang sunog sa alas 10:05 sa gabii human giisa sa una’ng alarma samtang wala’y gikataho’ng naangol nga mga trabahante tungod kay dali kini sila’ng nakapangayo og tabang.
Sa pagkakaron normal na ang sitwasyon sa kompaniya human sa insidente. (BANAT NEWS)