CEBU, Philippines – Pakyas gihapon ang mga konsehal nga kaalyado ni Mayor Michael Rama sa pagpasar sa Supplemental Budget No. 1. Kini human ang mayoriya nga sakop sa Bando Osmeña Pundok Kauswagan (BOPK) nisupak sa pagtuki sa SB-1 nga kasamtangang gihiklin una sa konseho.
Si Bise Mayor Edgardo Labella sa iya’ng privilege speech atol sa regular session kagahapon niawhag sa konseho nga buksan ug tukion ang SB-1 aron dili mabalda ang paghatag sa batakang serbisyo sa katawhan.
Nalakip sa SB-1 ang P87 milyones alang sa tipping fee sa basura nga ilabay sa garbage facility sa lungsod sa Consolacion.
Matud ni Labella nga dili na angayang mabalaka ang konseho human gibasura na sa korte ang kaso nga gipasaka ni Romulo Torres.
Si Konsehal Nida Cabrera usab sa iya’ng privilege speech niingon nga ang P87 milyones dili sulbad sa problema sa basura.
Matud niya nga wala gi-implementar ang sistema ug wala motabang ang barangay environmental officers sa pag-monitor sa pag-segregate sa basura.
Kini ang hinungdan nga gisugyot ni Cabrera ang pagpatuman sa Philippine Ecological Solid Waste Management Act of 2000 ug paghangyo sa Department of Public Services sa pag-monitor sa kabarangayan kung gi-implemntar ba ang balaud.
Ang dakbayan sa Sugbo mobayad og tag P700 matag tonelada nga basura nga ilabay sa landfilll sa Consolacion. – /GMR) (BANAT NEWS)