CEBU, Philippines – Gi-disqualify sa Commission on Elections ang duha ka kandidato sa pagka-konsehal sa siyudad sa Talisay gumikan sa kapakyas sa pagduso sa ila’ng Statement of Contribution and Expenditure (SOCE) sa niagi’ng eleksiyon.
Kini mao sila si Lee Consul nga ubos sa Nationalist People’s Coalition ug Antonio Vargas nga usa ka independente.
Matud ni Mariela Remorosa, assistant election officer sa Talisay, nga tanang kandidato, daug man o pilde, ang moduso gyud sa ila’ng SOCE human sa eleksiyon.
Si Bise Mayor Romeo Villarante nga kandidato sa pagka-mayor sa NPC niingon nga ila’ng huwaton ang suwat gikan sa Comelec ug tun-an ang lakang nga ila’ng himuon. Samtang laing napulo ka kandidato kinsa nidagan sa nilabay’ng mga eleksiyon ang giingong wala nakaduso sa ila’ng SOCE.
Matud ni Provincial Election Supervisor, Atty. Lionel Marco Castillano, nga ang wala pagduso og SOCE sukaranan kini sa “perpetual disqualification to hold public office.”
Dawaton gihapon sa Comelec ang ila’ng Certificate of Candidacy (COC) apan dili gihapon makalingkod sa posisyon kung modaug.
Usa si Edgar Pangandoyon, kaduha nagpapili isip konsehal sa lungsod sa Argao ug karon kandidato isip sakop sa hunta probinsiyal sa ikaduha’ng distrito ang wala nakaduso sa SOCE.
Ubang naa sa listahan nga wala nakaduso sa ila’ng SOCE ang nangapilde sa niagi’ng eleksiyon apan wala na magpapili alang sa sunod eleksiyon sa 2016. Samtang gidagsa sa mga tawo nga nagparehistro ang off-site registration sa Comelec sa Gaisano Fiesta Mall sa Tabunok, dakbayan sa Talisay.
Matud ni Remorosa nga ila na’ng gipangandaman ang gidaghanon sa mga tawo nga magparehistro sa katapusang semana tungod kay mao kini ang kasagarang mahitabo.
Karong Octubre 31 na ang katapusang adlaw sa pagpangrehistro. – /GMR) (BANAT NEWS)