Dalaga nalumos sa falls

CEBU, Philippines – Namatay ang cashier sa usa ka department store dinhi sa dakbayan sa Sugbo kay nalumos kini samtang nagpakuha og hulagway nga naligo sa Kawasan Falls didto sa Barangay Matutinao, Badian kaniadtong Martes sa hapon.

Gusto unta sa 21-anyos nga si Geraldine Indig, taga Barangay Patong, Badian, nga ibutang sa Facebook ang iyang hulagway nga anaa siya sa linaw ug background ang nagbusagak nga tubig sa falls.

Si SPO2 Jeremias Elardo sa Badian Police Station miingon nga kauban ni Indig nga naligo sa Kawasan Falls mao si Abegail de Guzman, taga dakbayan sa Sugbo, ug maoy iyang gipamalihug nga mokuha kaniya’g hulagway.

Matud ni SPO2 Elardo nga gisaysayan sila ni De Guzman nga si Indig nalingaw kaayo samtang gikuhaan siya’g hulagway diha sa linaw, apan anam-anam kini nga gianod sa bul-og sa tubig. Si De Guzman nga nakabantay sa sitwasyon sa iyang amiga, midali pagpangayo’g tabang kay si Indig dili diay makamao nga molangoy mao nga wala kini makapugong nga giganoy siya sa tubig paingon sa lawom.

Ang mga saksi mitug-an nga nakainom og daghang tubig si Indig mao nga mitidlom kini sa tubig. Taud-taod, nakuha sa mga tawo ang lawas ni Indig nga wala na maglihok.

Gidala pa unta si Indig sa Badian District Hospital apan gideklarar kini sa mga doktor nga patay na. Si SPO2 Elardo mitataw nga dili tinuod ang report nga nag-selfie si Indig ug natagak ngadto sa falls.

“Nagpa-picture ra siya. Nalingaw siguro to ug wala makabantay nga napunta sa lawom nga bahin sa linaw, unya dili kamao molangoy,” matud ni Elardo.

Nahibaw-an nga ang linaw nga gikaligoan ni Indig dili kaayo lawom kun itandi sa ubang bahin sa Kawasan Falls. Katapusang higayon nga may nalumos sa Kawasan Falls niadto pa’ng tuig 2010. – /RUB) (BANAT NEWS)