Mga barangay gipasidunggan

CEBU, Philippines – Nag-una ang mga barangay Subangdaku, Ibabao-Estancia,  Canduman, Paknaan ug Mantuyong sa 27 ka barangay sa dakbayan sa Mandaue nga nakadawat sa Barangay Integrated Awards gikan sa Department of Interior and Local Government.

Si DILG City Director Jhoaden Lucero niingon nga ang paghatag og pasidungog mao’y pag-ila sa malampuson nga mga programa nga napahimuslan sa katawhan sa kabarangayan.

Ang Subangdaku isip Most Promising Barangay ang nakadawat og P150,000; Most Outstanding Barangay in the Protection of Children ug P100,000 ug Most Aspiring Barangay in Development Planning ug P50,000 nga salapi.

Ang Ibabao-Estancia nga giila nga Most Outstanding Barangay in Peace and Order ang nakadawat usab og P100,000 ug Most Outstanding  Barangay in Solid Waste Management ug P50,000.

Samtang ang Paknaan ang Most Outstanding Aspiring Barangay in Disaster Risk Reduction and Management ang nakadawat usab og P50, 000 ug ang Mantuyong isip Most Outstanding in Full Disclosure Policy Compliance ang nakadawat usab og P50,000.

Gipasidunggan usab ang mga barangay nga Most Outstanding Lupong Tagapamayapa 2015 nga naglakip sa barangay Paknaan nga nakadawat og P75, 000; ang Banilad nakadawat og P60,000; ang Basak P45,000; ang Casuntingan P30,000 ug ang Mantuyong P15,000.

Gipasidunggan usab sa Bidlisiw Foundation ang tulo ka barangay isip Most Outstanding Barangay in the Protection of Children ug P50,000 usab nga salapi ang nadawat sa barangay nga naglakip sa Subangdaku, Mantuyong ug Cambaro. – /GMR) (BANAT NEWS)