CEBU, Philippines – Gituohang gitulis ug dayon gipatay ang usa ka lalaki nga nakaangkon og samad sa ulo nga napalgan kagahapon sa buntag didto sa Sitio Wa-ug, Purok 4 Lower, Barangay Cambinocot ning dakbayan sa Sugbo. Si SPO2 Wetzel Berry, imbestigador sa homicide section sa Cebu City Police Office (CCPO) miila sa biktima nga si Noel Ardita, 39, minyo nga nagpuyo ra usab sa Barangay Cambinocot.
Usa ka tawo nga nanugway og baka maoy una nga nakakita sa lawas sa biktima nga nagbuy-od ug patay na. Ang ulo sa biktima may samad pinusilan ug posible nga agi sa kalibre 45 nga pistola.
Nasayran ni SPO2 Berry nga si Ardita kanunay nga magdaladala og sling bag nga may sulod nga pistola ug kuwarta. Kaniadtong miaging adlaw si Ardita nagsige’g pangita’g kuwarta aron ibayad sa piyansa sa iyang igsuon nga nadakpan sa kalambigitan sa drugas.
Si Ardita gikataho nga paingon unta sa iyang manukan nga nahimutang sa mingaw nga bahin sa maong lugar apan kini posibleng giatangan ug gipatay. Wala na marekober ang sling bag sa biktima.
Wala ipadaplin ni SPO2 Berry ang posibilidad nga kaila ra ni Ardita ang mihimo sa krimen. Gawas sa anggulo nga tulis, lakip ‘sab sa gisubay sa mga otoridad nga personal ang motibo sa pagpatay.
Gumikan sa kamingaw sa lugar wa’y nakuha nga testigos ang kapolisan, apan nagpadayon pa ang ilang imbestigasyon. – /RUB) (BANAT NEWS)