CEBU, Philippines – Gihangyo ni Talisay City Mayor Johnny V. delos Reyes (JVR) ang katawhan nga dili na lang dasigon si kanhi kongresista Eduardo Gullas nga modagan sa pagka-mayor atbang kaniya tungod sa iya’ng pangedaron.
Matud ni JVR nga maglisud na og lakaw si Gullas tungod sa iya’ng pangedaron ug angay na lang kini nga mopahuway ug ihatag sa mga batan-on ang posisyon.
"Mura gud og warrior nga ang hari molingkod na lang ug dili na mo-away," matud ni JVR.
Asoy pa niya nga kung siya ang matagaan og laing higayon nga mag-mayor andam siya nga modawat sa mga maayo’ng tambag ni Gullas alang sa kaayuhan sa dakbayan.
"Sa iya’ng pangedaron dili na lang nato siya itukmod nga tagaan og daku’ng problema," asoy ni JVR sa Banat News.
Samtang si Konsehal Dennis Basillote, ang runningmate ni JVR, nitug-an nga kung naluoy ang katawhan ni Gullas dili nila kini botaran ug ila na’ng papahuwayon.
Si Basillote kanhi kauban ni Gullas sa Alayon Party apan nitapon sa Liberal Party human sa eleksiyon sa barangay ug naparot ang iya’ng anak nga nidagan sa pagka-kapitan sa Dumlog.
"The more siya nga discouraging nga makita sa iya’ng mga supporters kay tiguwang naman siya," matud ni Basillote.
Si Basillote niangkon nga iya’ng nakita si Gullas nga giagak niadto’ng pagduso sa iya’ng certificate of candidacy.
Nagkanayon si Basillote nga kung simbako makadaug si Gullas maproblema kini sa pagsaka sa iya’ng opisina tungod sa kalisud sa iya’ng panglawas.
Gawas ni JVR ug Gullas, magpapili sab sa pagka-mayor sila si Bise Mayor Romeo Villarante ug usa ka independente nga si Araceli Go. – /GMR) (BANAT NEWS)