Suspensyon ni Radaza di makiangayon–tigpamaba
CEBU, Philippines – Di makiangayon ang pagsuspenso kang Lapu-Lapu City Mayor Paz Radaza ug sa lain pang mga opisyal kalabot sa kaso pundo sa Girls Scouts of the Philippines (GSP) nga gisang-at kaniadto pang tuig 2004. Matud pa sa tigpamaba sa mayor nga si Jonji Gonzalez, wa makadawat ang mga abogado ni Radaza mahitungod sa maong preventive suspension. Apan giklaro sa pamahayag nga kining kasoha nahitabo dihang dili pa mayor si Radaza ug wala’y kalabotan sa iyang pagkamayor sa dakbayan sa Lapu-Lapu ang maong kaso ug nagtuo sila nga kun tinuod nga adunay preventive suspension nga gimando kang Radaza, wala kini kapasikaran.
Matud pa sa pamahayag sa kampo sa mayor, ang preventive suspension, ipahamtang ngadto sa usa ka opisyal sa gobiyerno para dili ma-impluwensyahan ang mga testigos ug aron dili mahilabtan ang mga ebidensya sa kaso. Giklaro usab niini nga dili kini usa ka silot.
Sumala pa sa ilang pamahayag, parte kini sa GSP ug dugay nang panahon nga dili na sakop sa maong pundok ang mayor.
“Wala’y rason nga isuspenso siya kay ang kaso sa Girl Scout wala’y kalabutan sa iyang pagka-mayor,” dugang pa sa pamahayag.
Matud pa ni Gonzalez, sa lima ka tuig nga pagkamayor ni Radaza wa kini malambigit sa kurapsyon.
Kauban ni Radaza sa gisuspenso sa Sandiganbayan Fifth Division mao sila si Board Member Celestino “Tining” Martinez III, Bogo City Councilors Rhett Minguez ug Cresencio Verdida samtang silang duha mao pa ang municipal treasurer ug accountant.
Ang kaso may kalambigitan sa P15 milyones nga pork barrel funds ni kanhi Kong. Clavel Asas Martinez niadtong 2002. Si Board Member Martinez sa iyang bahin daan ng mipahibalo nga anha lang siya mokomento kun makadawat na siya og kopya sa kamandoan. (BANAT NEWS)
- Latest
