CEBU, Philippines – Nasunog ang walo ka mga balay sa Sitio Sea Breeze, Barangay Mactan dakbayan sa Lapu-Lapu kagahapon sa alas 5 sa buntag.
Nagkanayon si Senior Fire Officer 1 Climaco Salisid sa Lapu-Lapu City Fire District nga nabiyaang lutoanan nga naggamit og butane canister ang nakaingon sa maong sunog.
Gidudahan nga ang karga sa maong butane canister, liquefied petroleum gas (LPG) nga gidili sa kabomberohan tungod kay wa gidesinyo ang mga butane canisters para tubilan pagbalik.
Usa ka Rommel Tuñacao residente sa maong dapit nga nakahinabi sa mga imbestigador ang gikatahong mitug-an nga nagsugod ang kalayo sa ilang kusina, matud pa duna kini nabiyaang giluto.
Ang mga nasunog nga balay ginama og mixed materials ug gibanabana ni Salisid nga anaa sa P300 mil ang danyos. Ang mga nasunogan mao silang Tuñacao, Michael Villamor, Antonio Ducay, Jr. , Selvistra Son lakip na ang managparente nga silang Joey Ducay, Josefa Ducay, Carlito Ducay ug Felix Ducay.
Walay gikatahong naangol sa maong insidente tungod usa kini ka aksidente, apan mao na kini ang ikaduhang sunog nga niigo sa Lapu-Lapu gumikan gihapon sa paggamit og dili luwas nga butane canisters nga gikargahan og liquefied petroleum gas (LPG).
Atol ning pagbalita, laing sunog ang niulbo sa dakbayan sa Mandaue ug padayon pang gikombate sa kabomberohan ang kalayo. (/EIM) (BANAT NEWS)