Nibayad og pekeng P500 sikop

CEBU, Philippines - Nadakpan sa nagtinabangay nga mga estambay ang usa ka lalaki nga gipasanginlang mibayad og fake nga P500 sa gipalit niining usa ka kahang sigarilyo  diha sa dalan Sotero B. Cabahug, Ibabao, Dakbayan sa Mandaue.

Si Police Officer 2 Jesson Flores sa Presinto sa Mandaue City Police Office (MCPO) miila sa nadakpan nga mao si Raymond Raganas, 21, taga Samboan.

Ang tindera nga si Fernanda Pandapatan  mibutyag nga gipalitan kini sa suspetsado og usa ka kaha nga sigarilyo ug gibayran siya niini og P500.

Apan human niya nadawat ang kwarta nakabantay dayon siya nga peke kini mao nga iyang giuli ang kwarta apan gikatahong nikaratel og dagan ang suspek dala ang iyang sigarilyo.

Ang mga estambay nga nakadungog sa pagpangayo niya og tabang daling miresponde ug gitabangan og gukod ang suspek hangtud nga kini nadakpan ug gihatud ngadto sa mga polis.

Ang suspek gikatakdang pasakaan og kaso tungod sa paggamit og peke nga kwarta. (BANAT NEWS)