30 ka illegal fishers kasohan sa DENR

CEBU, Philippines – Gipasakaan og kaso sa Department of Environment and Natural Resources (DENR)-7 ang 30 ka tawo nga nakalapas sa Section 20 sa Republic Act 7586 kon National Integrated Protected Areas System(NIPAS) Act of 1992.

Kini human sa gihimong operasyon sa DENR pinaagi sa pakigtambayayong sa Bureau of Fisheries and Aquatic Resources (BFAR)-7 ug sa Philippine National Police (PNP) diin duha ka panagatan ang nakompiskar nga illegal nga nanagat sa Tañon Strait Protected Seascape(TSPS) area.

Ang Regional Director sa DENR-7 Isabelo Montejo mipagawas og kamandoan sa tanang DENR enforcement division staff lakip na usab sa mga protected areas superintendents ug rangers nga mohimo og regular nga monitoring ug surveillance operations sa mga illegal fishing activities sa rehiyon.

Base sa incident report, atol sa gihimong operasyon niadtong Septiyembre 24 ning tuiga, alas-4 sa kaadlawon nakit-an sa mga otoridad ang FB San Vicente Ferrer nga gipanag-iya ni Fredo Scoba ug mga crew niini nga illegal nga nanagat sa maong lugar.

Tungod niini, ilaha silang gidakop ug gikompiskar ang 15 ka fish coolers diin tulo niini puno sa mga nagkalain-laing klase sa isda.

Nakuha usab ang mga nagkadaiyang gamit sa pagpanagat sama sa pisi, battery, pukot, sinker, makina, plastic barrel ug fish finder.

Ang 12 ka tripulante sa maong panagatan lakip na ang tag-iya nga si Fredo Escoba, 57, ang gipasakaan og kaso.

Ang maong mga tripulante mao sila si Julito Carriaga, 48; Sidriele Cardona, 32; Niño Sostres, 22; Danny Salud, 27; Sixto Dio, 32; Roque Fajardo, 27; Daryl Abson, 24; Anthony Bilita, 22; Jonas Licanda, 20; Fretz Dumagil, 34; ug John Warren Mergal, 45, nga pulos gikan sa Sta. Filomena, lungsod sa Alegria.

Gawas sa FB San Vicente, laing panagatan ang gidakop mao ang FB Sto. Niño nga iya sa usa ka Florante Jara diin 15 usab ka fish coolers ang nakuha ug mga nagkadaiyang gamit sa pagpanagat.

Ang Sto. Niño dunay 18 ka tripulante ug kini naglangkob sa tag-iya nga si Flora Jara, Paquito Alpuerto, Gerald Bustamante, Filemon Sardemio, Danilo Jara, Robert Tagonton, Elende Flores, Jim Abreo, Teddy Calumba, Enrico Entera, Jay Baguio, Jerome Caliao, Reynard Mondico, John Carl Balasbas, Bambit Caliora, Peter Calumba, ug Reanie Calumba, nga molupyo sa Barangay Camandayon, Jimalalud, Negros Oriental.

Ang duha ka panagatan wala makapakita og legal nga dokumento nga legal silang makapangisda sa dapit nga usa man kini ka protected area.

Samtang, subay na sa paghingusog sa ilang kampanya batok sa illegal fishing laing duha ka panagatan ang nadakpan niadtong Oktubre 10 diin illegal sila nga nanagat sa kadagatan sa Barangay  Zaragosa, lungsod sa Badian ug Barangay Bulado, Guihulngan City, Negros Oriental.

“Our team is still preparing all the needed documents for the filing of case for these offenders, we will file the case maybe by next week,” matud ni Montejo.

Gihimug-atan ni Montejo, dugang operasyon ang ilang himoon sa nagkadaiyang illegal fishing hotspots ilabi na dapit sa marine protected areas sa rehiyon. – /EIM) (BANAT NEWS)