CEBU, Philippines – Human ang sunod-sunod nga insidenteng binuhatan sa “bukas kotse gang” sa dakbayan sa Sugbo ang kapolisan mimando sa pag-ila sa mga suspek ug mipahimangno sa adunay mga sakyanan nga di mokompiyansa.
Si Senior Superintendent Rey Lyndon Lawas, chief of staff sa Police Regional Office 7, miingon nga angay ilhon sa Theft and Robbery Section sa Cebu City Police Office ang mga responsable sa maong krimen.
Apan matud pa niya nga samtang wala pa mailhi ang mga responsable kinahanglang magmabinantayon ang mga tag-iya sa mga sakyanan kun sila mo-park.
Iyang gipahinumdoman ang mga adunay sakyanan nga dili magbilin og bag, gadgets, kwarta, alahas ug bisan unsa nga makadapit sa pagtagad sa mga kawatan.
Iya sad nga gipanawagan ang mga tag-iya og mga parking lots, ug mga establisamento nga butangan og suga ug mga closed circuit television cameras ang mga parking areas.
Kinahanglan usab nga adunay tawong molibot pagbantay aron di makahigayon ang mga kawatan. – /EIM) (BANAT NEWS)