CEBU, Philippines – Duha ka buwan sa dili pa ang Pasko, gipaubos sa seminar ang mga manufacturer ug retailers sa mga pabuto sa barangay Babag 2, dakbayan sa Lapu-Lapu alang sa luwas nga pagpanghimo ug pagpamaligya niini,
Mismo ang kadagkuan sa Firearms and Explosive Security Agency and Guards Supervision Section (FESAGSS), City Fire Department, City Legal Officer, Lapu-Lapu City Police Office ug buhatan sa mayor ang nipasiugda sa kalihukan.
Si Mayor Paz Radaza ug LLCPO Director Armando Radoc niawhag sa mga retailers ug manufacturers nga mosunod lang gyud sa mga safety measures aron ang kalambuan sa barangay dili maundang tungod sa mga kinabuhi’ng madaut o makalas.
"Ang ilahang pag-gama og pabuto diin nahimo na man ni’ng means of livelihood nga sila mismo, kung makahibalo sila unsaon pag-amping, makapadangat dayun sila sa mga tawo nga kini’ng mga pabuto dili delikado," matud ni Radoc.
Si Radaza sa iya’ng speech niuyon ni Radoc nga usa kini ka panginabuhi ug angay sab mosunod sa gi-implementar nga balaud.
"Isip mayor ako naningkamot nga kamo matabangan sa inyo’ng livelihood ug masuportahan ta mo sa inyo’ng panginabuhian apan tabangi sad ko ninyo nga kanunay safety jud ang inyo’ng hatagan og importansiya," matud sa mayor.
Nagkanayon sa Banat News si Kapitan Epifania Augusto nga ang mao’ng fire safety seminar usa ka preparasyon sa umaabot nga kalihukan sama sa Bag-ong Tuig ug Pasko ilabi na usab sa nagkaduol nga piyesta sa dakbayan.
Dugang sa kapitan nga ang mga klase sa pabuto sama sa piccolo ug judas belt ang gidid-an nga himuon sa mga residente’ng nahilambigit sa negosyo tungod kay kung i-display kini sa mga nagkadaiya’ng stalls, mopahigayon og inspeksyon ang police ug fire investigators sa dakbayan.
Si Attorney Vonrad Fernando Dobluis, acting chief inspector sa Lapu-Lapu City Fire District, niingon nga bisan og niagi ang mga tighimo og pabuto sa mao’ng seminar, moagi usab sila og laing diskusyon ubos sa fire district. Si Radoc nipahibawo nga magsugod sila og inspection sa mga stalls sa mao’ng barangay sa mosunod nga semana. - /GMR) (BANAT NEWS)